Guzaarish

Aa jao

dekho sooraj dhalkar laut aaye panchhi

raat ho gayi

dekho nikal aaye tare

so nahi sakte hum

intezaar hai tumhara

laut aao, ab toh

 Chaar deewari hai, par ghar nahi

daulat hai par khushi nahi

sur hai par awaaz nahi

baaton ka matlab nahi

Sab kuch hokar bhi

kuch nahi...

Aa jao

lauta do sab kuch

lauta do humari dhadkan

jo uda karti thi panchhi ki tarah

lauta do woh ankaha rishta

jo baandha tha tumse

lauta do humara dil

jo le gaye the tum

is samay uski sakht zaroorat hai.

Dekho raat ho gayi

nikal aaye taare

ek ek karke saare diye bujh gaye

ab sirf ek chaand hai humsafar

tum toh kab ke akele hi chal diye.

Mitti toh insaanon mein farak nahi karti

saans tootne ke baad

wahi mil jayenge hum aur tum.

Tumhari aankhein hai

jin mein meri parchhai nahi.

Meri dhundhli aankhein hai

jin mein tumhare alava

aur kisi ki parchhai nahi.

Khidki hai

par koodna nahi chahte.

Zindagi hai

jo jeena nahi chahte.

 Aag hai jiska dhuaan nikalta nahi

….aur bina maut aaye

bina chikhe chillaye

apne dard mein samaye

paagal patanga jala ja raha hai.

 Aa jao

dekho akele hai hum

aur so nahi sakte

intezaar hai tumhara

laut aao, ab toh...