Ankahee

Bas nishaan reh gaye hain

kharaashein kab ki bhar chuki

par marham koi kaam nahin karta

kyonki un sabhi adhuron ka daag

jalta hai, ab bhi.

Sawalon ke jawaab chahiye.

Poore hone wale khwaab chahiye.

Maang rahe hain

par koi sunta hi nahin.

Dekh rahe hain sabhi

par koi kuch karta hi nahin.

Uparwaale ki dhun par naachti hui

iss tarah rang badalti hai duniya

ke girgit ko bhi sharminda kar de.

Humein sach jhooth ki samajh ab tak nahi aayi

kyonki sabhi ne naqaab pehne hain

jo kabhi utarte hi nahi,

apne kirdaar nibhate nibhate
zindagi raakh kar gaye.

Suna tha, "zarre zarre mein usi ka noor hai".

Nahin chahiye aisa noor

jo kabhi dikhta hi nahi.
Nahi chahiye aisi roshni
jo andhera naa bhaga sake.

Jwaar bhaate ki tarah ho gaye hai hum

iss bhag-daud mein

agar do pal ruke bhi

toh khel khatm.

Andhere mein jeete jeete

kaundhti hui roshni se nafrat ho gayi hai

andhera kar do thoda

usi mein paate hain aaram.

Khamosh hai lehrein

lekin bheetar panap raha hai toofan...