baitha hai woh aankhein bandh kiye
duniyabhar ke shor mein
chand pal khamoshi khojte huye
aur uske chehre par
shikan tak nahi
...shaayad khoya hai
kisi ke khayalon mein kahin
aur ek hum hai,
ke duniya bhar ke ulte seedhe taalon par
apni dhun bithate huye
yeh jaan hi na paaye...
kab humari dhun
uske khayalon ke saath goonjne lagi
...background music ban kar
ab usey dekh ke
kadam bhi uchhal uchhal kar lene padte hain
kya karein
...zindagi itne mod lete lete
seedhi honi jo bandh ho gayi hai
jab begaane apne bante hain na?
toh khushi hoti hai, alag si, ajeeb si
jaise garmi ke din ganne ke juice ka glass
jaise shor sharaabe se bhara
chhota sa koi class
jaise ek sukoon
jo humein mila hai
bade arse ke baad
kehne ko toh bahut hai
lekin ab ke liye bas yehi keh payenge
ki uske badalte taalon par
kuch aur badle na badle
humare sur wahin goonja karenge
background mein...
0 handprints on my wall:
Post a Comment